Samajhdar ho Gaya Hai tu!

Ab hum bade ho Gaye Hain
Uth Kar khade ho Gaye Hain
Doosro ko peeche chod
aage badhna seekh Gaye Hain
Ab hum bade ho Gaye Hain

Ab Dil se jyada
dimaag ki sunne lage Hain
Pyari si muskan par bhi
Shak karne lage Hain
Chote se bacche ko bhi
Paiso se lubhane lage Hain
Uphaar ki kimat prem se jyada maan Gaye Hain
Ab hum hoshiyar ho Gaye hain

Mehetvapoorna vishyo pe
charcha karne lage Hain
Aur chai sutte mein
Unhi vishyo ko udane lage hain
Kuch banne ke jazbe ko, kabiliyat ko
Upyogita se maapne lag pade hain
Ab hum kamyaab ho chale hain

Anubhav ke bhoj ko
Sanjoke rakhe hue hain
Doosro ke Gam se jyada
apni Khushi ki parwah Karne lage Hain
Pariwar mein hasne khelne se jyada
Vyatigat samay ko jaruri jaanne lage hain
Iss duniya mein jeene ki jagah
Isse ladne ki taiyaari Karne lag gaye hain
Ab hum samajhdar ho gaye hain